ப்ரம்மரம் (2009) - மலையாளம்

கல்கத்தா நியுஸ் என்ற மொக்கை படத்திற்குப்பின் பிளஸ்சி இயக்கிய அற்புதமான படம் ப்ரம்மரம். தமிழில் அதிகம் விமர்சனம் இடப்பட்ட மலையாளப்படங்களில் ஒன்று. பிடித்த படங்கள் எது என்றுகேட்டால் ஆயிரம் சொல்லலாம். பாதித்த படங்கள் எதுவென்று கேட்டால் சில படங்கள் மட்டுமே நினைவில் வரும். அதில் ஒன்று ப்ரம்மரம்.

சிறுவயதில் செய்யாத தவறுக்கு தண்டனைப்பெற்று அதனால் இளமையைத்தொலைத்து பின் புதிய வாழ்க்கை தொடங்கிய ஒருவனின் வாழ்க்கையில் மீண்டும் அதே பிரச்சனை புயலை கிளப்பும்போது அதனை எதிர்கொள்ள, பிரச்சனையை தீர்க்க எடுக்கும்முயற்சி கடைசில் அவன் அவன் வாழ்க்கையில் மாற்றத்தை ஏற்படுத்தியதா?  வண்டின் இரைச்சல் போன்று மனதில் குடைச்சல் கொடுக்கும்  விசயத்திற்கு தீர்வு கிடைத்ததா? படத்தைப்பார்க்கவும்.

பள்ளிப்பருவத்தில் இரண்டு மாணவர்கள் ஒரு மாணவியை குளத்தில் தள்ளிக்கொலை  செய்ய தவறுசெய்யாத மாணவன் சிவன்குட்டி(மோகன் லால்) மேல் பழிசுமத்தப்படுகிறது. ஏழுவருடங்கள் சிறையில் கழித்து இளமையை தொலைத்து திரும்ப வருபவன் ஊரைவிட்டுசென்று பெயரையும்மாற்றி பழசை மறந்து திருமணமும் செய்து அன்பு மனைவி, அழகான பெண்குழந்தையுடன் மகிழ்ச்சியாக  வாழ்கிறான்.

ஒரு திருமண விழாவில் கலந்துகொள்ள அங்கு சிறுவயதில் கொலைசெய்யப்பட்ட மாணவியின் தாய் சிவன்குட்டியை அடையாளம் கண்டு அவனிடம் ஆத்திரம் கொள்ள, இந்த சம்பவம் ஊருக்கும், அவன் மனைவிக்கும் தெரியவருகிறது. தன் கணவன் ஒரு கொலைகாரன் என நினைத்து மகளுடன் தன்தாய் வீட்டுக்கு கிளம்புகிறார் மனைவி.

மனைவி மகளிடம் அதிக பாசம் வைத்திருக்கும் சிவன்குட்டி அவர்களிடம் அந்த கொலையை தான் செய்யவில்லை என்ற உண்மையை அந்த கொலையை செய்தவர்களை கூட்டிகொண்டுவந்து
உண்மையை புரியவைக்க அந்த இரண்டு பேரையும் தேடி பயணப்படுகிறார். கடைசியில் உண்மைதெரிந்து சிவன் குட்டி மனைவி மகளுடன் சேர்ந்து வாழ்ந்தாரா? படத்தைப்பாருங்கள்.

படம் முழுவதும் லாலேட்டனின் ஆதிக்கம். தன்மாத்திரா, நரன் படங்களில் பார்த்த மோகன்லாலை விட இதில் இருமடங்கு விஸ்வரூபம் எடுத்திருக்கிறார். பால்ய நண்பனின் வீட்டில் நண்பனாக அறிமுகப்படுத்தி வீட்டுக்குள் நுழைவதும் தன்னை அடையாளம் கண்டுகொண்ட நண்பனிடம் பிரச்சனையை விளக்கி வீட்டுக்கு வந்து உண்மையைசொல்லுமாறு கேட்பதும் என காட்சிக்கு காட்சி மோகன்லாலின் ஆக்கிரமிப்பு. மோகன்லால் என்னும் நடிப்பு அரக்கனின் முன் வருபவர்கள் எல்லாம் தூசாக தெரிகிறார்கள். லாரிஓட்டும்போது ஒரு டிபிக்கல் லாரி ட்ரைவரை கண்முன்னே நிறுத்துகிறார். க்ளைமாக்ஸ் காட்சியில்... போதும் இதற்குமேல் சொல்ல வார்த்தைகள் இல்லை. கடைசியாக ஒன்றும் மட்டும் இந்தப்படத்தில் புரியவில்லை, பிளஸ்சி ஏன் இதில் பூமிகா வை நடிக்க வச்சாரு?  அன்னார கண்ணா வா பாடல் இன்னும் மனதில் நிற்கிறது.

தன்மாத்ரா படம் கொடுத்த வெற்றியில் விருது வாங்குவதற்காக அதே தாக்கத்தில் இந்தப்படத்தை எடுத்ததாக கூட சொல்வதுண்டு. ஆனால் இரண்டு படத்துக்கும் எந்த விதத்தில் ஒற்றுமை இல்லை. தனித்தனியாக பிரம்மிப்பூட்டுகின்றன. நல்ல படங்களை தேடிச்சென்று பார்ப்பவர்கள் இந்தப்படத்தை தவறவிடவேண்டாம்.

  ப்ரம்மரம்- முழுப்படமும் யூட்யுபில் கிடைக்கிறது.